Գենագիր. Հայկական մշակութային կոդի թվային հարատևություն «Գենագիրը» հայկական մշակութային ժառանգության թվային շտեմարան է, որը կամուրջ է հանդիսանում հազարամյա ակունքների և ժամանակակից ստեղծագործական մտքի միջև։ Մենք հավաքագրում և թվայնացնում ենք հայկական զարդանախշեր, ժայռապատկերներ, կառույցներ, կրոնական շինություններ ու իրեր, դրամներ, պատվո ցուցատախտակներ, արձաններ, պատմական ճարտարապետական շենքեր, տապանաքարեր ու տառատեսակներ՝ դրանց նոր կյանք տալով ժամանակակից դիզայնում և արտադրությունում։
«Գենագիրը» հիմնադրվել է իրավագետ և անկախ հետազոտող Գոհար Գորգիսյանի կողմից՝ հայրենապահպանման շուրջ երկարամյա մտորումների և հայ մշակութային ժառանգության հանդեպ ունեցած մասնագիտական հետաքրքրության արդյունքում։ Տեսնելով հազարամյա արժեքների թվային պաշտպանվածության և հանրահռչակման հրամայականը՝ նախաձեռնողը ձևավորել է մասնագիտական թիմ՝ միավորելով գիտնականների, հնագետների, լեզվաբանների, մշակութաբանների ու ազգագրագետների։ Թվային թանգարանի այս մոդելը մշակվել է փորձագիտական խորը ուսումնասիրությունների հիման վրա՝ ապահովելով գիտական խստապահանջություն և հուսալիություն։
Աշխատանքային պրոցեսում թիմին միացել են նաև տաղանդավոր գիդեր, լուսանկարիչներ, գրաֆիկ դիզայներներ և նվիրյալ կամավորներ, որոնցից յուրաքանչյուրը հավատարմորեն ծառայում է հայկական ժառանգության վերաիմաստավորման և պահպանման գործին։
«Գենագիր» նախագծի կայացումը հնարավոր է դարձել ՀՀ Բարձր տեխնոլոգիական արդյունաբերության նախարարության աջակցությամբ, որը հիմք հանդիսացավ հարթակի տեխնոլոգիական զարգացման և թվային մոդելի իրականացման համար։ Մեր գործունեության առանցքը հիմնված է պետական և մշակութային գերատեսչությունների հետ սերտ համագործակցության վրա։ Ծրագրի հաջողությունը պայմանավորված է ՀՀ Կրթության, գիտության, մշակույթի և սպորտի նախարարության, Երևանի քաղաքապետարանի, ինչպես նաև հանրապետության բոլոր մարզպետարանների ցուցաբերած պատրաստակամության և աջակցության շնորհիվ։ Հատուկ շնորհակալություն ենք հայտնում հայաստանյան թանգարաններին և մշակութային օջախներին՝ արխիվային նյութերի տրամադրման և վստահության համար։ Մեր աշխարհագրությունը չի սահմանափակվում Հայաստանով. բանակցություններ ենք վարում սփյուռքի հայ համայնքների հետ՝ օտար երկրներում պահպանվող հայկական մշակութային ժառանգությունը նույնպես կայքում ներառելու նպատակով։
Այս լայնածավալ գործընկերությունը «Գենագիրը» դարձնում է համահայկական նշանակության հարթակ։